عالم البنات تحت سن العشرين!!!!!!!!!!منقول!!!!!!!!!!!!!!

عالم البنات تحت سن العشرين ...عالم من الاسرار والحكايات..تدور معظها حول:

-الدراسة..
-العمل بعد التخرج
-زوج المستقبل
وتكون لكل صبية من هؤلاء اهتماماتها:
-الابراج ..
-الاغاني الشبابية ..
-الموضة ..

ومعظمهن يرفض تدخل الاهل "الزايد" عن حده"في شؤونهن..فكيف يفكرن؟
"فوستا" كثرت غلبتها ..واقتحمت عالم الصبايا وكانت الحصيلة على النحو التالي:

-ميرفت علي/طالبة في التوجيهي-رام الله :

انا
مشغولة بمدرستي ودراستي والكلية اللي يطمع فيها هي كلية الآدب قسم الصحافة
لاني بتمنى اصير مذيعة تلفزيونية وبتصورانه عندي كل المؤهلات لهيك.."اهتم
بمظهري وبنقي الاواعي بدقة حتى انه صار عندي خبرة في هالمجال فكثير من
صحباتي بياخدو رأيي في اواعي بيفكروا انهم يشتروها..
علاقتي بأبوي علاقة اصدقاء وانا ما بخبي عنه اشي بصارحه بكل شيء وكمان نفس الاشي بالنسبة لأمي ..

بدي اياه زلمة..!!

جوز
المستقبل بتخيله زلمة بكل معنى الكلمة ..ناضج في تفكيره وبحب الطراز
القديم من الرجال اللي بتحمل المسؤولية مش زي هالشباب اللي كل همه السيارة
والبلفون ومعاكسة البنات والشخلعة في الحفلات.

بآمن بالمكتوب مش بالحظ

ما
بآمن بابراج الحظ ..لانه ما بعلم الغيب الا الله والمكتوب ع الجين لازم
تشوقه العين..وكمان ما بحب الاغاني اللي بيقولوا عنها شبابية ..شو شبابية
يعني الغناوة هي الغناوة بس تكون حلوة بكلماتها ولحنها واداءها ..اما
غناني السعادين اللي طالعة هالايام ما بتخش مخي.. بحب سماع صوت عبد الحليم
وهاني شاكر وكاظم الساهر لانه غنانيهم راكزة والها معنى.

-سمية عبد العزيز / طالبة اول ثانوي -نابلس

اللي
بيشغلني هالأيام اني أترك المدرسة فرأيي انه الشهادات في هالايام ما الها
أي اهمية ..ما هيهم ماخذين دكتوراة حتى ومرميين في الشوارع بدون شغل
..علشان هيك بحاول اقنع ابوي اني اسيب المدرسة وآخذ دورة كوافير او في
الخياطة ..أو سكرتاريا..او أي مهنة بدي اختصر الطريق ولايش وجع الرأس..بس
ابوي مصمم على اني اكمل المدرسة ..واروح جامعة ..ودايما بيقوللي الشهادة
قبل أي شيء وبعدين الله بيفرجها واللي بشجعني على ترك المدرسة اخوي الاكبر
مني اللي بشتغل نجار وصدقوني بيطلع مصاري كل شهر قد عشر موظفين وانا ضايعة
بين كلام ابوي وكلام اخوي ولو اني بميل لرأي اخوي.

الحشمة اولا:

بالنسبة
للموضة انا ما بهتم فيها كثير لانه الانسان بجوهره مش بمظهره بس هادا ما
بعني اني البس مبهدل واي اشي بلبس في حدود المعقول وبحب الحشمة في الاواعي
علشان هيك ما بلبس التايت ولا القصير ولا المزلط ..وبحب الجينز لانه بسيط
وعملي

انا والعيلة كل يغني مواله!

بالنسبة للعيلة ابوي وامي
وخواتي واخواني..بقول بصراحة انه كل واحد بيغني على مواله..ابوي في واد
وامي في واد ثاني واحنا الاخوة كل واحد فينا اله عالمه الخاص فيه عشان هيك
بتلاقونا زي الفرقة الموسيقية اللي كل واحد فيها بيعزف على آلته لحن مختلف
عن الثاني بدي اعبر عن رآي او الا في حل المشكلة ما بلاقي حدا يسمع لي كل
واحد ملتهي بحاله ..ما بعرف ليش؟!!

لسه بدري ع الحب؟؟!!

بتسألوني
عن مواصفات جوز المستقبل ؟لسه بدري ع هالسؤال انا ما بفكر لا في الجواز
ولا في الحب لأني شايفة الناس ماشية على المادة والمصالح...بلا حب بلا
غيره..وما في واحد بيفرق عن الثاني في هالايام كل واحد بدو مصلحته
وانبساطه ..ما في صورة في خيالي لفتى الاحلام أو جوز المستقبل ما بعرف ليش
بس هاي هي الحقيقة...انا بآمن كثير بابراج الحظ ..وصدقوني كثير ظبطت معاي..

"كمننا"

بحب كثير الغناني الشبابية بس مش كلها في بعض غناني بتخشش مزاجي وبلاقيها سمجة مثل غنيوة "كمننا" شو يعني "كممنا"؟
وبحب كمان بعض اغاني عبد الحليم حافظ اللي بقدر اقول عنها انها شبابية ومرحة.

-دلال -ع-طالبة جامعية سنة اولى /جنين

بصراحة
كل اللي بفكر فيه هو الارتباط بشاب بعيش معاه قصة حب سخنة كثير بس مش
عارفه كيف بدي اصارح اهلي وأقنعهم فيه لانهم دقة قديمة في تفكيرهم واسلوب
حياتهم وهو زيي تمام متحرر وبعيش بروح العصر وهادا اشي مش راح يعجبهم بس
انا بحبو كثير شاب من عيلة فوق ومليان وكمان أمور ومستعدة وقت اللزوم ابيع
الدنيا كلها علشانه..!!

يا روحي ع الموضة!

الموضة ؟؟يا روحي
ع الموضة بس يا خسارة زي ما بيقولوا العين بصيرة والايد قصيرة ..بيجي ع
بالي البس اللي بشوفه في الفتارين وفي مجلات الأزياء من فساتين وبنطلونات
وبلايز بس ما في مصاري وكمان اهلي ما بيرضو اكيد البس العريان والمحزق
والضيق والقصير ..آل ايش ؟؟!عيب مع اني بشوف انه العيب اشي نسبي وبعدين
اخلاق البنت مش باللي تلبسه في اللي بتعمله..
مد وجزر!

انا
وأهلي علاقتنا مد وجزر زي موج البحر مرة انا باجي مع رأيهم في بعض الامور
ومرة بيجو معي بس انا بسايرهم اكثر ما هم بيسايروني لانه ما في توافق في
التفكير يمكن علشان انا من جيل وهم من جيل ..نفسي انطلق اروح آجي البس
ارقص من غير ما حد يحطني تحت الحراسة واعملي هيك وما تعمليش هيك..!!

الابراج ..كلام فاضي!

ابراج
الحظ كلام فاضي ..الانسان هو بس بقدر يصنع حظه مش الحظ هو اللي بيصنع
حياته..عشان هيك بتشوف الشعوب اللي بتشتغل وبتفكر بتبدع وبتنتج اما الشعوب
اللي عايشة على الحظ والسحر والغيبيات فبتلاقيها متخلفة في كل اشي ...زي
الشعوب الشرقية.

ودن موسيقية

صدقوني عندي ودن موسيقية وما
بحب الا الموسيقى والالحان اللي فيها فن وحرفة عشان هيك ما بسمع الا
الموسيقى والغناني الغربية لمطربين وموسيقيين عالميين ..اما غنانينا
الشرقية فما الها وجود في نظري لأنها وبقولها بكل صراحة تافهة وعشان هيك
ما بتوصل للعالمية..

والآن ماذا يقول الكبار الذي كانوا شبابا في الامس عن صغيرات هذا الزمان اللواتي سيصبحن كبيرات الزمن الآتي؟!!
كان لـ"فوستا"هذا اللقاء الخاطف مع "ام زكي" التي لديها سبعة من الابناء والبنات
حيث قالت :
"والله زي ما بيقول المثل:احترنا يا قرعة من وين نبوسك"..وهذا المثل بينطبق ميه بالميه على بنات هالايام.. ما عاجبها العجب..!!

وتضيف
ام زكي خدو مثلا كذا واحد بيتقدم للبنت من هدول واقربهم بنتي الكبيرة
"سناء" اللي بتطلع في كل واحد عيب :هادا كبير ..هادا شكله مش هلقد..هادا
مسقع ..هادا دمه ثقيل ..هادا ما بقدر يفتح بيت وهادا دقة قديمة ..وهادا
شايف حاله ..وهادا عيلته مش هلقد..وهادا ..وهادا لما طلعت عيني شو اللي
بدها اياه انا مش عارفة.

بنات "اخر زمن"

طول نهارهم
هالبنات وبعد ما برجعوا من المدرسة ما بيقولوا انه النا ام لازم نساعدها
في شغل البيت هادي فاتحة المسجل ع الاخر وسارحة او بتغني وهادي رايحة جاي
قدام المراية خيطي ميطي وهادي دينها ومعبدها التلفزيون وهاي وهاي ..اعوذ
بالله من الجيل !!
وكله كوم وقصة الكاسيتات اللي بيضيعن عليها مصروفهن
هادا كاسيت لهادا اللي بيسموه عمر "تقصد عمرو" دياب وهادا لمصطفى قمر وخود
من المسطرات ونازل.

ايام سوداء

تصمت "ام زكي"لبرهة ثم
تستكمل حديثها قائلة :يا اخي ما احنا كنا بنات في سنهن بس ما كنا نعمل هيك
كنا نحترم اهالينا بنحافظ على الحشمة وكان صوتنا ما يطلع شو اللي بدهم
اياه كلام امنا وابونا هو اللي كان يمشي وبدون مناقشة ..لا كنا نعرف لبس
البنطلونات ولا الشخلعة ولا القصوعة كان في اشي اسمه عيب واخلاق وفضيلة
وشرف وسترة مش زي هالايام السودة اللي بنعيشها..يا رب الطف بعبيدك.

» الفرق بين اغلاط الشباب واغلاط البنات
» ما يقال عن المرأه منقول
» اجمل صور قبل وبعد الجواز منقول
» امثله مضحكه عن المرأه منقول
» احلى نكت ع البنات